من زمان ما حطيت مواضيع مفيده للمنتدى والحين خل نطلع كل خبراتنا يالأمهات عشان الكل يستفيد
أول شي راح نكتب شنو نستخدم حق عيالنا من (حفاظات ، منتجات النظافه من شامبو وصابون وزيت ولوشن وكريم حفاظ وبودرة وعطور وكلينكس مرطب ، حليب الأطفال ، ماركة الرضاعات والحلمات ، غلي الرضاعات ، المصاصات ، الملابس الاستهلاكيه من ملابس داخليه وملابس النوم وملابس البيت )
ثاني شي راح نتناقش عن الفطام عن الرضاعه الطبيعيه والرضاعه الصناعيه أحسن عمر وشلون الطرق السهله + إذا كان الطفل متعلق بشي معين من هو صغير مثل المصاصه أو لحاف أو لعبه او شي معين يسكته او ينيمه + تعليم الحمام + الأدوية اللي شفتوها تجيب مفعول سريع حق أمراض الأطفال العاديه مثل الحراره والرشح والاسهال والغازات والامساك + أحسن دكتور اطفال
ثالث شي راح نطرح موضوع تربية الأطفال يعني اذا الأم اداوم وين تخلي أطفالها على حسب اعمارهم يعني دون الروضه + شنو تشغل اوقاتهم فيه + إذا الطفل عنده اطباع موزينه شلون تتعامل معاه + الأماكن الترفيهيه والتعليميه للطفل دون الروضه
ياليت الأمهات يشدون حيلهم ويقولون كل شي عشان كل الأمهات يستفيدون وإذا فيه اخطاء ممكن ننبه عليها ونتعاون على تربية اطفالنا
بالنسبه لعيالي
راح ابدي بحمود
أول شي راح نكتب شنو نستخدم حق عيالنا من (حفاظات ، منتجات النظافه من شامبو وصابون وزيت ولوشن وكريم حفاظ وبودرة وعطور وكلينكس مرطب ، حليب الأطفال ، ماركة الرضاعات والحلمات ، غلي الرضاعات ، المصاصات ، الملابس الاستهلاكيه من ملابس داخليه وملابس النوم وملابس البيت )
الحفاظات استخدم له ليبرو لأن بمبرز كلش مارتاح له
المنتجات من أول ما نولد لي 8 شهور سيباميد وبعدين غيرته لمذركير وحاليا أي شي يعجبني استخدمه له
الحليب اول شي سيميلاك ما ناسبه بعدين عطوه مامكس ما ناسبه وآخر شي استقر على اس 26 ضد الارتجاع لين كمل 6 شهور وبعدين عطيته بروميل وبعد ما كمل السنه بروجريس ولي الحين على بروجريس
أغلي الرضاعات والحلمات والمصاصات بغلاية بخاريه من تشيكو
أستخدم مصاصات bibi شكل دنتل مقومه للأسنان
الملابس انوع اشتري من سنتر بوينت (جونيور) صراحه كد ومد ولا يختربون بالغسيل واسعارهم مناسبه وتشكيلاتهم لا بأس بها واشتري من مذركير وماركس آند سبينسر ونكست ودبنهامز وآدمز هذول للملابس الداخلية والبجامات وملابس البيت (حق الحوسه)
بالنسبة لدانه
كل شي نفس أخوها ما عدا الحليب طبعا بديت بحليب اس 26 ما ناسبها وبعدين ابتاميل كمفورت ما ناسبها وبعدين نوفالاك ناسبها بس ما حصلته كلش قطعوه فترة وبعدين استقريت على نان1
ثاني شي راح نتناقش عن الفطام عن الرضاعه الطبيعيه والرضاعه الصناعيه أحسن عمر وشلون الطرق السهله + إذا كان الطفل متعلق بشي معين من هو صغير مثل المصاصه أو لحاف أو لعبه او شي معين يسكته او ينيمه + تعليم الحمام + الأدوية اللي شفتوها تجيب مفعول سريع حق أمراض الأطفال العاديه مثل الحراره والرشح والاسهال والغازات والامساك + أحسن دكتور اطفال
بالنسبة لحمود لي الحين يرضع رضعه او رضعتين باليوم قطعها فترة بس بعد ما جبت دانه رد لها بكل قوه وهو لأنه عصقول من جذي ما منعته وحاطه في بالي لي كمل 3 سنين راح اقطع عنه حليب الأطفال
والحفاظات استخدم له حفاظات مجنني عنيد ومو راضي يتعلم عالحمام وحاطه في بالي بالصيف إذا أخذت اجازة راح اتفرغ له
وهو متعلق بالمصاصه بقوووووووووه ولحاف ابيض(يشمه) اثنينهم مكملين لبعض عشان إذا حن وبجى او حق النوم ضرووووري لكن لأنه من جبت اخته اتعسر وصاير حنان وصياااح يبط الجبد مالي خلق اقطع عنه لا المصاصه ولا اللحاف
أما الأدوية للحراره تحاميل عشبيه من ألمانيا صراحه فظيعه + شراب بروفينال
أما للزكام والرشح إيباستيل + زيرتيك
أحسن دكاترة أطفال
عفاف الرومي
فهد المخيزيم
جوديت
ودانه تو الناس عليها بعدها بيبي
ثالث شي راح نطرح موضوع تربية الأطفال يعني اذا الأم اداوم وين تخلي أطفالها على حسب اعمارهم يعني دون الروضه + شنو تشغل اوقاتهم فيه + إذا الطفل عنده اطباع موزينه شلون تتعامل معاه + الأماكن الترفيهيه والتعليميه للطفل دون الروضه
أداوم وأخلي حمود عند خالتي ودانه اوديها عند أمي كل يوم
حمود يحب افلام الرسوم المتحركة مثل هابي فيت ونيمو ومانستر انك وشارك تيلز وميدغشقر + الوان وشخابيط + قصص + سيارات وبقيات الصغيره بالشحن وقواري + دوارف
أما دانه تحب ديرفتها بالبطاريه + الكرسي الهزاز + فرشه عالأرض عشان تتقلب واشوفها كأنها يبي لها المشايه
حمود عنييييييييد وشيييييييييييطااااااااان عبثي وحركي ويبي يلفت الإنتباه ومجنني ومجنن اهلي واهل زوجي أما بره فيصير عاجل وشحلاته
عقابي بالدرجه الأولى احبسه بغرفه يبجي لين يتأسف وإذا صار شيطان مره ثانيه اهدده بالغرفه وما يسوي شي بعض المرات اطقه إذا مصخها
دانه حنانه وما تبي تقعد بروحها او تنسدح على فراشها تبي الشيل وتبي احد يلعب معاها حلها الوحيد اني اشيلها + بعض المرات اشغل لها لعبة سريرها + مصاصه
طبعا حمود يموووت عالبحر مثل ابوه يستانس يروح سوق شرق ويقعد عالكراسي اللي عالبحر + يحب المركز العلمي عشان يشوف الشارك على قولته + السيرك وبالدرجه الأولى الجمعيه لووووول
ماشالله عليج موضوعج حلو وانا صج اندمجت فيه
انا عندي 3 بنوتات ..طبايعهم تختلف طبعا لكبيرة هادية بكل شي حتى ولادتها اسهل ولادة عندي..لصغيرة نزززززززززززززغة شيطونة اما الوسطية عاجل بس من تحت لي تحت ..بس كلهم استخدمت لهم السيميلاك لين سنة بعدها يشربون مثلنا النيدو او كليم قليل الدسم
العطور من القرشي قوليلهم ابي عطور الا طفال وفطومة لكبيرة تحب عطر كالم من الشايع تكشخ فية حق المدرسة..الملابس احب اوشقوش الي ببلازا وللبجامات احب سنتر بوينت امممم طبعا لانهم بنوتات يحبون الاكسسوارات فلاغنى عن كليرز..
امممم احب اوديهم يلعبون بالاماكن المفتوحة مثل الحدايق والبحر وقليل اوديهم الالعاب الى بالمجمعات مثل حولي بارك .. بس غرامهم المركز العلمي..عسى بس مانسيت شي هذا الي اذكره
موضوع حلو عشان كل وحده تستفيد من الثانيه مشكوره ام محمد
انا عندي بنت وولد البنت عمرها 6 سنين والسنه اليايه ان شاء الله اتروح الابتدائي والولد فهودي وعمره اربع سنين واخر هالسنه راح يدخل الروضه
ريومه اتحب اتلون واتحب القصص الملونه وغرامها ام بي سي ثري وسبيس تون واذا داومت اتروح الروضه
فهودي اسم الله عليه شيطان ويحب اللعب والاكتشاف وعيبي اني امدلعته وما ارضى عليه لان يكسر خاطري بس ازفه اذا خرب او سوا شي غلط واذا داومت اخليه عند امي الله يخليها لي
واحسن شي مستشفى الشفا عندهم اطباء اطفال ما شاء الله عليهم
انا عندي مروم عمرها ست شهور استخدم لها حفظات بامبرز والحليب اس 26ضد الارتجاع لانها ترجع كثير مااحب اطلع منها وصياحه بس تبيني الاعبها ومااتركها بروحها,واستخدم منتجات جونسن , اما ملابسها من مذركير ونكست وبجاماتها من ستي بلاز ,
